Alkaraz osvojio Ju-es open i prvo mjesto na ATP listi

10
Foto: Garrett Ellwood/USTA

Španski teniser Karlos Alkaraz osvojio je Ju-Es open pobijedivši u finalu Norvežanina Kaspera Ruda sa 3:1 (6:4, 2:6, 7:6, 6:3). Nakon uspjeha u Njujorku, tinejdžer iz Španije najmlađi je teniser koji se popeo na prvo mjesto ATP liste od 1973. godine, kada je ona ustanovljena.

Pobjedom nad Norvežaninom Kasperom Rudom, devetnaestogodišnji Španac ostvario je meteorski uspon u svjetskom tenisu.

Svoj prvi meč na nekom ATP turniru Alkaraz je odigrao u februaru 2020. u Rio de Žaneiru kada je imao 16 godina i uspio je da prođe prvo kolo pobjedom nad Vinjolasom.

Samo dvije i po godine kasnije, mladi Španac je na svjetskom vrhu posle osvajanja prvog grend slema iako je u karijeri osvojio samo šest turnira.

U finalu Ju-Es opena pobijedio je Kaspera Ruda sa 3:1, po setovima 6-4, 2-6, 7-6(1), 6-3.

Put do finala nije bio lak. Imao je jedan brejk zaostatka u odlučujućem setu u četvrtom kolu protiv Marina Čilića, u četvrtfinalu je igrao protiv Italijana Sinera ušavši u istoriju kao akter meča koji je najkasnije završio na Ju-Es openu, dok je u polufinalu poslije velike borbe u pet setova savladao Amerikanca Frensisa Tijafoa.

Meč protiv Ruda dobio je nešto lakše, s tim da je Rud već imao iskustvo igranja u finalu grend slema – ove godine u Parizu, kada je poražen od Rafaela Nadala.